Hoy: Bilbao Kultur Lab

Bilbao Kultur Lab Bordeleko unibertsitateko ikasleekin batera Bilbon burututako kazetaritza proiektu bat da. Pasadan maiatzaren 7tik 14ra, Multimedia Komunikazioa EHU-EITB masterreko lau ikasle elkarlanean aritu ginen frantziarrekin. 

www.bilbaokulturlab.com web gunean batu ditugu sortutako lan guztiak. Kulturaren betaurrekoak jantzita begiratu behar izan dugu Bizkaiko hiriburua, horixe izan da, amankomunean izan dugun ardatza, hortik aurrera, bakoitzak berea. 

Baina zer izan da eta nola bizi izan dute Bilbao Kultur Lab Bordeleko ikasleek? Marc Bouchage-n hitzak:

Euskara Interneten: KORRIKA 17

Amaitu berri den 17. KORRIKA dela eta lan ikaragarria egin dute antolatzaileek Interneten, eta nola ez, euskara izan da ardatza, euskaraz egin dute komunikazio kanpaina. Aro berrira egokitu dira eta gainera, aurtengo komunikazio esperientzia ez da euskarrira egokitze hutsa izan, are urrunago joan dira arduradunak eta esango nuke, praktika on baten adibide ere izan direla.

KORRIKA 17k Sarean egindako komunikazio lana aztertzea erabaki nuen Multimedia Komunikazioa EHU-EITB Masterreko A1 Moduluko lana burutzeko, erakunde baten estrategia informatibo berria zein den eta nola egiten den aztertzea. KORRIKA 17ren Sareko komunikazio kanpainaren nondik norakoek osatzen dute jarraian datorren lana.

Korrika 17 sarean

View more documents from keikrass

KORRIKA 17 SAREAN on Prezi

Argia.com webgunearen azterketa

Multimedia komunikaziorako estrategia linguistikoak irakasgaian Euskal Herriko ziberkomunikabide bat aztertu behar izan dugu. Argia.com aukeratu dut analisirako, hemen emaitza:

Argia.com webgunearen azterketa

View more documents from keikrass

Etorkizuneko gazteak eta euskal hedabideak

Euskarazko hedabideen kontsumoa bizkortzeko bezeroak ongi ezagutu behar dira eta eurek nahi duten horretara egokitu produktua. Azken urteetan euskarak hiztun kopuru handia irabazi du, 200.000 inguru hizkuntzaren ezagutzari dagokionez. Baina Euskal Herriko IV. Inkesta soziolinguistikoak jasotzen dituen datuak aztertuta eta Euskararen Aholku Batzordeak bultzatutako Euskara Hedabideetan planaren inguruko txostena irakurrita, ezagutza ez dela nahikoa ondorioztatzen da.

Euskararen ezagutza hazi den arren, ezagutzeak ez du erabiltzen denik bermatzen. Hau da, Euskal Herriko biztanleriaren %58,9 erdaldun elebakarrak ziren 2006an baina erdara bakarrik erabiltzen zutenak %74,9. Hortaz, biztanleariaren %16ak euskara ezagutzen du baina ez du erabiltzen. 

Erabilera bultzatu behar da, euskara hizkuntza eroso bihurtu behar da eta euskal hedabideek ardura horretan dagokien erantzunkizuna beregain hartu behar dute. Euskarazko produktuak sortu behar dituzte euskaldunak uxatu gabe, beren hizkuntza elikatzeko eta euskarazko kontsumo ohiturak sustatzeko.

Gaur egungo natibo digital petoak izango dira etorkizunean euskarazko produktu multimediak zein euskarazko komunikabideak kontsumituko dituztenak. Eta adinean aurrera doazela hizkuntza erabiltzen jarraitzeko euskararekiko hartu-emana elikatu behar da, transmisioa gal ez dadin. Izan ere, hezkuntzari esker euskararen ezagutza ikaragarri hazi da gazteen artean, baina behin nerabezarora helduta, zein hedabide kontsumitzen dute? Zein hizkuntzatako hedabideak dira oro har? Kontsumitzen dituzten horietatik guztietatik zenbat eta zeintzuk dira euskal hedabideak?

Euskarak erreferente bilakatu behar du Sarean. Eta gazteen kontsumo ohituretan integratu. Horretarako, komunikabideek produktu berriak sortu behar dituzte, gazteentzako produktuak. Horrela, eskolatik lan mundura pasa bitarteko tartean nolabaiteko lotura bat izan dezaten euskararen kontsumoan eta etorkizunean euskarazko kontsumitzaile eroso bihur daitezen.

Euskara ikasi da baina ez da gaztaroan sozializaziorik egiten eta sozializazio hori biziki beharrezkoa da, gerora euskara erabili zein transmiti dadin. Beraz, euskal hedabideek hutsune hori betetzen saiatu behar dute. Bide horretan, Sareak izan behar du euskarria eta produktu multimediak elikagaia. Euskara eraldatu egin beharko da bide modernoetara egokitzeko eta era horretan, egun dauden hutsuneak betetzeko. 

Ti-Ta produksions eta Korrika17 : Ongi etorri euskarara

17. Korrika dela eta AEK-k Euskalaklip bideo lehiaketa jarri du martxan. Ti-Ta produksions taldekook Ongi etorri euskarara lana sortu dugu.

Aurrekoan esan bezala baldintzak gaia eta denbora izan dira: Maitatu, ikasi, ari... euskalakari leloa agertu behar zen behintzat behin eta gehienez ere hiru minutu izan zitzakeen. Euskalakaria euskara maiatzen, ikasten eta erabiltzen duena da edota euskara erabiltzeko helburuz, euskara maitatuz, euskara ikasi eta hobetzeko ahaleginak egiten dituena. 

Horregatik, eta AEK-k urte guzti hauetan zehar egindako lanagatik, euskarara hurbiltzen diren guztiak gogoan hartuta egin dugu gure lana. Euskarara hurbiltzen diren guztiei ongi etorria eman nahi izan diegu eta bide batez, guztiori Korrikarako gonbitea luzatu. Euskararen aldeko lasterketak, 10 egunez, gelditu barik, euskararen eremua zeharkatzen baitu gure hizkuntzaren alde.

Gaurtik aurrera gehien gustatu zaizuen Euskalakliparen aldeko bozka eman dezakezue, Korrika 17ren web gunearen bitartez. Guztira, bideo laburren lehiaketa honetan 43 lan jaso dira. Bideorik baloratuenen artean Korrika 17k izendatuko duen epaimahaiak hartuko du azken erabakia eta Euskalaklip-ik onenak I-PAD bat irabaziko du. 

Animatu eta bozkatu! 

Eskerrak eman nahi dizkiegu aktore lanetan aritu direnei eta gure lana posible egiten lagundu diguten guztiei: 

Iñaki Larrañaga, Oihane Resano, Nagore Madina, Karmelo Soria, Iñaki Gallastegi, Anton Bolinaga, Nestor Uriarte, Fernando Guillén, Valentin Egidazu, Angel Irisarri, Luis Mari Ugaldea, Angel Fernandez de Arroiabe, Jose Martin Gallastegi, Miren Amesti, Alex Igartua, Patxi Fernandez, Isidro Gomez, Jose Mari Gonzalez, Silvia Formentin, Mathieu Viatta, Berriolope nekazalturismoa - Nati, Pipas , IKB bideo, Buenos Aires landetxe jatetxea, Parra taberna + Anaren pintxoak, Elorrixoko gaztetxea, Abizari AEK , Pitxar elkartea, Iratxe, Ane Amesti eta Sagu. Eta bozkatuko gaituzuen denori ere. Eskerrik asko!!!

Zein leku dute ikus-entzunezko produktuek multimedia diskurtsoan?

Multimedia diskurtsoan ikus-entzunezko produktuek duten lekua aztertzen aritu naiz. Eta diskurtso multimedia falta zaigula ondorioztatu dut.

Izan ere, gero eta bideo gehiago aurki ditzakegu ziberkomunikabideetan, baita euskarazkoetan ere baina ikus-entzunezko horiek txertatuta edo integratuta daude dagozkien euskarrietan?

Bideoen funtzioa bestelako medien bidez zabaltzen den informazioa osatzea izan ohi da, edota errepikatzea. Oraindik gutxi dira izaera autonomoa duten piezak, eta gutxiago multimedia diskurtso batean integratuta daudenak. 

Hedabideek gero eta hobeto ezagutzen dute Sarea, eta gero eta hobeto menperatzen dituzte honen teknikak. Multimedia diskurtsoa lantzea falta zaie baina pausuak ematen hasiak dira. Beraz, ez da denbora asko falta ikus-entzunezko produktu integratuak gure ziberkomunikabideen informazio eremu nagusietan aurkitzeko.

Multimedia erreportajea: bereizgarriak eta erronkak

Sarearen iraultzak kazetaritza tradizionalaren eraldaketa ekarri du, eta noski, genero guztiei eragin die aldaketak, erreportajeari baita. Egun, multimedia erreportajeaz dihardute aditu zein arituek. Baina zerk bereizten du erreportaje multimedia betiko erreportajetik? 

Sarearen baliabideek, eta nagusiki, bitarteko horietako hiruk: hipertestuak, multimediatasunak eta interaktibitateak.

Hipertestua: lotura bat duen testua da, klikatzean beste norabait eramango gaituena. Hipertestuari esker, informazio osatuagoa eskaini edo informazio iturriak erakus daitezke, testua luzatu beharrik gabe. Gainera, edukien arteko loturak egiteko funtzioa ere badauka, horrela, erabiltzaileari nabigatzeko bide bat(zuk) proposatuz.

Multimediatasuna: ezaugarri honetatik hartzen du izena Sareko erreportajeak. Izan ere, orain arteko mugak gainditu eta medio guztiak integratzea ahalbidetu du Sareak: ahotsa, soinua, irudia, bideoa eta testua.

Interaktibitatea: hipertestuaren erabilerak igorle eta hartzaileen arteko elkareragina sustatzen du. Edukiak elkar lotuz, hartzaileak nolabaiteko askatasuna baitauka erreportajean zehar nahierara nabigatzeko. Gainera, iruzkintzeko zein edukia zabaltzeko aukerak daude, foroetan parte hartzeko bideak, inkestak, online elkarrizketak... interaktibitatearen eskutik etorriko da aldaketa.

Sareak kazetaritza parte hartzailea ahalbidetzen du. Hau da, bere baliabideak era eraginkorrean ustiatuz gero eta egungo jendarte pasiboan txip aldaketa bat emanez gero, herritarrok elikatuko dugu kazetaritza etorkizunean. Erronka eta aukera paregabea iruditzen zait, erabat demokratikoa.

Gazteak eta proiektu propioak

Dela lanagabeziaren aurrean, dela iniziatiba propioz, dela halabeharrez edota ezustean... proiektu propioak!

Euskalaklip: Korrika egingo ez dugun bideo lehiaketa

Aurten, ikus-entzunezkoen sorkuntzarentzako proposamena luzatu dute Korrikakoek. Euskalaklip bideo lehiaketa Korrika Kulturala 17ren ekimena da eta Ti-Ta produksions-ekook ezin izan dugu aukera pasatzen utzi. Ostiralean hasiko dugu grabaketa eta otsailaren 25erako amaituko dugu lana. Zuek ere bideozaleak bazarete, badakizue, oraindik garaiz zabiltzate. 

Maitatu, ikasi, ari... Euskalakari!

Sinadura bilketa, ETBn euskaldunak euskaraz soilik aritzeko

ETBn euskaldunak euskaraz egin dezaten eskatzeko sinadura bilketa jarri da abian Sarean. Euskararen Semaforoa blogean irakurri dut albistea goizean. ZuZeun ere eman dute ekimenaren berri Euskararen Semaforokoek eta honezkero, Total la parte en euskera no la lee nadie blogean eta Sustatun ere zabaldu da albistea. Twitter-en ere aritu dira atxikimendua zabaltzen eta ekimenaren atzean nor dagoen galdetzen. Izan ere, momentuz ez da inon ageri bultzatzaileen nortasuna.

Hala ere, albiste ona da euskararentzat. Euskaldunok interpelatu eta gure eskubideak exijitu behar ditugu. ETBko agintari eta langileek barneratuta duten lan dinamikak euskara gutxietsi eta kaltetu egiten du. Naturalki, pertsonai euskaldunak euskarazko kateetan euskaraz, eta gaztelerazkoetan gazteleraz agertarazten dizkigute. Pertsonai erdaldunei aldiz, ez diete inolako dualtasunik eskatzen.

Egunero marrazten duten errealitate artifizial horrekin, euskararen eguratsa manipulatzen dute, ikus-entzuleoi anormala eta baztertzailea den jokaera hori naturala bailitzan aurkezteko, gure ikontzienteetan ideia hori ernetzeko. Baina nazkatu gara. Euskaldunak euskaraz ikus-entzun nahi ditugu eta beharrezkoa denetan, azpitituluak erabil ditzatela, ez bikoizketa. Ez da lan handiegia gainera, gaztelerarekin gauza bera egiten dute, beraz, euskarak ere errespetu eta estatus bera behar ditu.

Momentuan 282 lagunek sinatu dute eskaera eta goraka doa etengabe. Ez da ageri sinadurekin zer egingo den baina nahi duenak manifestua EITBra bidaltzeko proposamena ere luzatu da, e-postaz info@eitb.com edota kontaktu formulario honen bidez. 

Euskaldunak Euskaraz ETBn manifestua irakurri eta sinatu. Denona da erantzunkizuna!

Kultura bonua spot lehiaketak ez daki euskaraz

Izendatu dituzte kultura bonua spot lehiaketako irabazleak. Eitb eta kulturklik atariek gaztelera saritu dute, euskara ez omen dute ulertzen.

Kultura bonua Eusko Jaurlaritzako Kultura Sailak abian jarritako ekimena da. Bonoak 25€ balio izan du, baina kanpaina horretara atxikitutako 366 saltokietan, 40€-ko gastua egin ahal izan dute bonoaren jabeek. Bonoaren helburua kulturaren kontsumoa sustatzea izan da. Bonoarekin liburuak, musika, pelikulak, zine sarrerak, zuzeneko ikuskizunak... erosi ahal izan dira. Eusko Jaurlaritzak orotara, 59.000 bonu jarri ditu eskuragarri, hau da, 885.000€ bideratu ditu ekimen horretarako.

Baina, kultura sustatzeko kontsumoa sustatu behar al da? Ekimen hauxe gabonetan egitea ez al da kasualitate handiegia? Zein da benetako helburua? Gure herrian sortzen diren kultur ekimenek kontsumoa sustatzea edo ekimenak sustatzea behar dute? Uste nuen kultura herriak egiten duela eta herriak laguntzak behar dituela kultura hori gauzatzeko, ez erosteko. Ezen, kontsumozko kultura honetan, kontsumitzen dena soilik al da kultura? Kontsumitzen den horrek soilik balio al du gure kultur nortasuna sendotzeko? Edo errentagarria bada balio du eta bestela ez? Aberastasuna ez litzateke eurotan soilik neurtu behar, horrela bide batez, ez ginateke hain pobre sentituko gure egunorokoan.

Bigarren urtez egin dute ekimen hau eta aurtengoan, iaz baino %6 bonu gehiago saldu dira Blanca Urgell, Eusko Jaurlaritzako Kultura Sailburuaren arabera. Gainera aurten, berritasun modura, Interneteko bideo-spot lehiaketa jarri dute abian Eitb.com eta Kulturklik atariekin elkarlanean. Lehiaketaren helburua kultura bonuak izan ditzakeen erabilera eta aplikazio ugariak erakustea izan da. Eta bide batez, "kultura dibertsio iturri izateaz gain, norbere burua aberasteko eta kultura garatzeko balio duela erakustea". Bada lehiaketara 37 lan aurkeztu dira. Guztira 6.000€ banatu dituzte hiru irabazleren artean eta 10 kultura bonu bi bozkatzaileren artean.

Kulturklik, Eusko Jaurlaritzaren kultura Sailaren ekimen bat da. Euskal Kulturaren gune elkarreragile bezala definitu dute euren atarian. Eta zer da EITB? Euskal Irrati Telebistak kate publikoa beharko luke izan. Publikoa den heinean gizartearen zerbitzura dagoen komunikabidea beharko luke izan eta euskal den heinean, euskal komunitatearena. Izena euskaraz badauka izana ere euskaraz beharko luke izan.

Eusko Jaurlaritza, euskal kultura eta euskal irrati telebista... eta sarituako hiru bideo lanak... Gazteleraz!!! Ai ene, inuxenteak bagara ba e... Gure spot-a bi hizkuntzatan egiteko lana hartu genuen eta gure inonzentzian uste izan dugu, horrelako ekimen batek ez duela gure hizkuntzaren egoera diglosikoa indartzeko erabakirik hartuko. Zenbat ostiko hartu behar ditugun oraindik! Baina beno, hain anormala ere ez da. Izan ere, herri honetako agintari gehienek euskara ez ulertzea normala bada eta EITBren zuzendariak bere kateek diotena ulertzen ez badu... Izaki elebidunak gara anormalak herrri honetan. 

Albisteak eta lehiaketaren bilakaerak amorrarazi egin ninduten eta hainbat gogoeta egin ditut egunotan. Hona antolatzaileei helarazi nahi dizkiedan kritikak:

- Parte hartzaileonganako arreta falta. Mezu bat bera ere ez dugu jaso. Ez lana jaso dutela jakinarazteko, ez sailkatuak izan garen edo ez esateko, ezta parte hartzeagatik eskerrak emateko.

-Spot bozkatuenak 1.000€-ko saria jaso du. Kontaketa sistema iruzur bide galanta izan da. Kontaketa %tan egin dute eta ez botu kopurutan, zenbakitan. Zergatik? Halaber, euskarazko bertsioko emaitzak eta gaztelerazko atarikoak ez zetozen bat.

-Data aldaketak. Irabazleen izenak urtarrilaren 18an kaleratu behar zituzten, egun osoa pasa genuen zain eta arratsaldean hurrengo egunera luzatu zuten erabakia. Inolako arrazoirik ez.  

-Saritutako hiru lanak gaztelerazkoak dira. Eta kalitatea ez da justifikazio. 

-Aztertu jarraian datorren grafikoa. Aurkeztutako 37 lanak ageri dira, kolore ezberdinez hizkuntzaren arabera eta Youtuben izandako ikustaldi kopuruaren arabera ordenatuta. Nola da posible spot bozkatuena horren gutxitan ikusi izana? Guk ere lagun pila ditugu, horregatik ageri gara goiko aldean, gure lagunek bozkatu eta ikusi egin gaituztelako.

Datorren urterako aholkuak: 6.000€ horiek hartu eta zuen lagunen bati eskatu spot-a egiteko. Eta slogana aldatu: Con C, con K consuma cultura-ri kendu K! Con c consuma cultura! Amen!

Nik ez dut zirko horretan parte hartuko!

Zer egin zibertestuak kalitatezkoak eta eraginkorrak izateko?

Ahozko zein idatzizko zibertestu bat kalitatezkoa eta komunikatiboki eraginkorra izateko hainbat erabaki hartu behar dira aurretiaz. Bai sorreran eta baita planifikazioan, hainbat urrats eta erabaki linguistiko-diskurtsibo kudeatzen dira. Prozesu hori gehienetan era inkontzientean egiten dugu baina batzutan, une batez gelditu eta prozesuaren kontzientzia hartzea onuragarria da.

• Zeintzuk dira prozedura-urrats nagusiak?
• Zeintzuk dira erabaki linguistiko-diskurtsiboak?
• Erabaki horiek, testuinguratzeari dagozkio? Egituratzeari? Testuratzeari?

Garrantzitsuena testuaren helburua argi eta garbi izatea da. Zer, nori, non, nola. Hasteko zertaz arituko garen erabaki behar dugu eta erantzuna ahalik eta gehien definitu, zertaz zehazki? Behin gaiaren ikuspuntua eta helburua zehaztuta hartzaileari erreparatu behar diogu eta baita euskarriari zein komunikabideari. Hiru puntu horiek aztertuta zibertestua nola gauzatu erabakitzea besterik ez zaigu geratuko. Prozesu osoan zehar, pausu bakoitzari dagozkion erabaki linguistiko-diskurtsiboak hartuko ditugu eta horietan oinarrituta eratuko dugu zibertestua. 

Halaber, Sarerako zibertestuak egiterakoan berebiziko garrantzia duten hiru ezaugarri daude, beti, ibilbide osoan zehar buruan izan behar ditugunak: multimediatasuna, hipertestua eta interaktibitatea.

Kultura bonua spot lehiaketa

Eitb.com eta Kulturklik-ek antolatutako kultura bonua iragartzeko spot lehiaketan parte hartu dugu. Ti-Ta produksions oporretan egon da orain gutxi arte baina urte berriarekin batera proiektu berriz bete dugu gure agenda.

Lehenengoa kultura bonua zer den eta nola erabili behar den azaltzeko spot bat egitea izan da. Irudimena martxan jarri eta botoiez osatutako stop motion bat egin dugu. Kultura bonua izeneko animazioa urtarrilaren 9an igo genuen sarera eta bihar jakinaraziko dituzte irabazleen izenak.

Hiru sari banatuko dira. Lehenengoa eta bigarrena epaimahai batek emango ditu, 3.000€ eta 2.000€ hurrenez hurren. Hirugarrena aldiz, spot bozkatuenak jasoko du.

Lan txukuna egin dugulakoan gaude eta promozio kanpaina itzela. Hala ere, urduri jartzen ere hasi gara, boto batzuk gehiago ez zaizkigu gaizki etorriko. Gaur da bozkatzeko azken eguna, beraz, hona link-a eta gure esker ona: http://www.eitb.com/kultura/kultura-bonua/

Erretzaile anonimo baten gogoeta adiktiboak

Bapatean erretzaileak bihurtu gara gizartearen arazo larriena. Geu gara kalearen minbizia. Futbolaren gaia baino astunagoa bilakatu da erretzearen aurkako legea. Aurkakoa, mugatzailea. Separatista.

Hemen ezin da, atearen parean ezta, joan harutzago, erne! ume bat pasatzera doa, kontuz! hutsik dagoen parke horretan txirrista jartzen ari dira... Itzali zigarroa auzokoak salaketa jarri baino lehen. Zein gozoa den anonimotasuna eta zein miserablea bakardadea, asperdura. Lehen ere polizia gutxi genituenez denok bihurtu gara orain txakur. Txakur alienatuak. Gure kaka jasotzen ikasi ez dugulako maite dugu albokoarena batzea. Ohituta gaude. Gixajoak gu, noraezean gabiltzan erretzaileak, eskerrak estatuak gure osasuna zaintzeko betebeharra sentitzen duen bestela... pobreagoa litzateke eta ez luke minbiziari aurre egiteko aurrekonturik edukiko.

Hipokresia eta interes ekonomikoa. Farmazien presioren bat tarteko. Narkotizatzeko balio handia duen aitzaki perfektua? Ke ba! Esnatu! Adikzio zikin eta ketsu baten ideia zentzugabeak besterik ez dira horiek! Nikotina gabeziak aluzinazioak eragiten ditu.

Ez didazue esango tabernak ez daudela tristeago? Garbiago baina hutsago. Eta jendarte zibilizatua ardiak baino otzanago kalean, denak ilaran, obediente. Minbizia sortzen dien salbatzaileari musu ematen, estatua aberasten eta gripea epidemia bihurtzen. Oraindik ezin dute isunik jarri baina kasu egiten dugu, inoiz ikusi ez bezala, sikiera desobedientzia piska bat mesedez. Orain arte ere, ilegala zen porroak erretzea, baina nire herrian ez zegoen legerik, punkiak zeuden, besterik ez. Orain porretak ere errespetatzen dute lege zibiko berria. Hori bai, kanpoan hotza egiten du eta porroak tabernan biltzen dituzte. No future.

Amaitu da erretzaileon pagotxa. Jendarte garbi, osasuntsu, kirolari eta ederrarentzat soilik da zilegi askatasuna. Kalea da kirastunon habia. Aurrerantzean adi, batek daki zeren txanda izango den hurrena. Laister agian etxean erretzen dutenena, edo bodegetara egiten diren ibilaldiena, edo kafeinomanoena, batek daki, agian, ikasteko ohitura arraro hori dutenena, irakurtzen dutenena, amets egiten dutenena eta noski, utopietan sinesten dugunona. Eta inork ez du protestatuko, ezta sinbolikoki ere, iada pentsatzen jakingo ez dugulako. Eskerrak emango ditugu. Egoera berriaren ontasunak goraipatuko ditugu lagun birtualei ere burukomina sortu arte. Eta bitartean, estatuak nahi duena egingo du berak emandako bazkarekin jolasean dabilen publiko entretenituarekin.

Erretzaileon errua izango da, lan eta pentsio erreformaren aldaketa ere. Berriz diot, no future!

Inozoa ni, estatuak jendarte garbi, osasuntsu, kirolari eta ederra nahi du hil arte lan egiten jarraitzeko eta edertasunak itsututako oparotasun faltsusko egunerokotasunean zorintsu izateko. Suizidak ere ilegalak dira, baina nik, inork agintzen ez didalako dut maite maite dudana. Gutxi biziko gara eta lan mordoa egin beharko dugu goserik ez pasatzeko, utz nazatela nahierara suizidatzen!