Berria.info

Ziberkazetaritza-ereduak eta genero berriak irakasgaian Euskal Herriko ziberkomunikabide bat aztertu behar izan dugu. Berria.info aukeratu dut analisirako, hemen emaitza: 

Berria.info

View more documents from keikrass.

Bestelako komunikazioa: Trabajadores desechables performancea

Bestelako Komunikazioa: estrategia informatibo berriak irakasgaian kasu praktiko baten azterketa egin dugu. Bestelako Komunikazioa hainbat esparrutan lantzen da eta guztiak dira osagarri. 

Lan honetako eszenatokia kalea da. Azken aldian gero eta anonimoagoa delako, gero eta aseptikoagoa. Horregatik, antzerki talde ezezagun batek kalean burututako performance bat da aztergaia. Alde teknikoa ez da batere ona. Euren ekintzak erakusteko bideoen edizioa oso eskasa da eta horien berri emateko daukaten bloga ere, eskaparate kutre xamarra da. Eta gainera, horrelako ekintzak gehienetan guettotan geratzeko arrisku handia daukate ez baita promozionatzeko ahalegin handirik egiten. Kasu honetan, Menéamen ageri denez, guettoa gainditzeko leiho txiki bat irekitzen da. Ideia paregabea iruditu zait, edozeinek ulertzeko modukoa eta umoretsua. 

Hona hemen atzoko klasean, Trabajadores desechables lana aurkezteko erabilitako euskarria:

Gaur egun ezinbestekoa da bestelako estrategia informatibo berriak praktikatzea. Komunikabide handiek markatzen dute agenda egunero-egunero eta hegemonia komunikatiboaz baliatzen dira, agenda hori interes ekonomiko eta politikoen arabera manipulatzeko. Ahaztu egin dute, hedabideek izan beharko luketen kontrabotere izaera eta boterea bermatzeko zein sistemak bizirauteko bitarteko bilakatu dira.

Sareak leiho berri bat ireki du. Euskarri tradizionalen izaera bertikaletik ihesean, estruktura horizontalekoa baita Interneteko ikuskizuna. Horregatik, aukera aprobetxatu behar da, ahalik eta gehien zukutu eta aktiboki eragin. Eta itsaso zabal horretan pilatzen den informazio gaindosian lekuak bilatzen jakin behar da. Hemen kokatzen da Bestelako Komunikazioa. Ohiko forma, diskurtso zein izaerak gaindituko dituzten proiektuak asmatu behar dira, era horretan, muga oro gainditzeko. Osagaiak: Irudimena, multimediatasuna eta tekonologien ezagupena. 

Europako aireportuetan hegaldiak atzeratuta, hotzak eta elurrak Euskal Herrian ere eragin du

Hotzak eta elurrak Europako aireportu nagusietan eragin du aire trafikoa paralizatuz. Denboraleak hegaldiak atzeratu ditu aireportu gehienetan. Euskal herrian ere eragin du hotzaldiak. Europatik zetozen 10 hegaldi bertan behera geratu dira Loiun, hain zuzen ere, Alemaniara zihoazen sei hegaldi, Frantziarako bi eta Britainia Handirako bi. Halaber, Araba, Nafarroa eta Gipuzkoako aireportuetan normaltasuna da nagusi. 

Egoera larriena Europako aireportu nagusietan bizitu da. Hotzak eta elurrak aireportuak itxi, hegaldiak atzeratu eta bidaiak bertan behera utzi ditu Europa osoan zehar. 

Britainia Handian, Heathrow-ko aireportua itxita egon zen atzo egun guztian zehar, eta gaur aldiz, zazpi hegaldi baino ez dira aireratuko. Gatwick-en berriz, arazoak izango dira bigarren egunez jarraian. 

Frantzian eta Alemanian ere antzeko egoera bizi dute. Hainbat hegaldi atzeratuta eta jende pilaketak aireportuetan. Europako aire trafiko handiena duen Alemaniako Franckfort-eko aireportuan 470 hegaldi bertan behera utziko dituztela aurreikusi dute. 

Datozen egunetan hegaldiren bat hartu behar baduzue, adi eguraldiari. 

Handikhona podcast-a

Pasadan urriaren 25ean Handikhona podcast-aren aurkezpena egin nuen. Sareko bidai irratsaio bat egin dugu eta podcast hori zabaltzeko ivoox.com plataformaz baliatu gara Multimedia Komunikazioa EHU-EITB Masterreko ikasleak. Bakoitzak interes turistiko berezia duen Euskal Herriko leku bat aukeratu du. Bertan aurki dezakezue nik Elorriora egun pasa joateko egin dudan gidatxoa. Edo hementxe bertan entzun!


Handikhona_Elorrio by keikrass

Euskal Herrian zehar bidaiatu nahi baduzu sintonizatu Handikhona! 

Quien mucho abarca, poco aprieta film laburra

Bila eta bila aritu gara eta azkenean aurkitu dugu iaz 24 Ordu Digitalean lehiaketara aurkeztutako lana. Hauexek izan ziren lanerako baldintzak:

- Gaia: Kontsumoa

- Esaldia: Txapel batek bi buru ezin estali / Quien mucho abarca poco aprieta

- Objektua: paperezko hegazkina

Zuen gozagarri Ti-Ta produksionsekook Elorrixoko Gaztetxean izenean egindako lana eta baita irabazleena ere, ederra da oso!

Ez dakizula asteburuan zer egin? World Press Photo eta Izarren Argia

Pare bat proposamen : World Press Photo eta Izarren Argia

Biak dira ariketa salatzaile hausnareragileak. Egun izkutarazten saiatzen diren intentzionalidade iraultzaile eta noble baten emaitza diren produktu artistikoak. Gasteizen ikusgai dagoen erakusketa, Mikel Ruedak zuzendutako filmearekin alderatuz gero, argazkitan dagoen artea ariketa gordinagoa dela esan genezake. Izan ere, ez da gauza bera langaia errealitatea+fotograma bat edo errealitate fikzionatua+milaka fotograma izatea. Poetikoagoa da luzemetraia, arinagoa, leunagoa eta aldi berean, gertaera latz baten oihu garratza. 

Euskarazko zinea atsegin dut. Baina errealismoa ere maite dut. Orain ez asko ikus-entzunezko produktuek beharrezko duten errealismoaz aritu nintzen hizketan lagun batekin eta Izarren Argia ikusten hasi eta... Ale! Militar frankistak eta mojak euskaraz! Euskara zuzen eta garbian gainera! Agian ni izan nintzen harritu zen bakarra, agian euskaraz aritzen ziren eta nire inkultura historikoa aireratzen nabil post honetan, baina mesedez, egizue bertsio originalaren aldeko apustua. Eta euskara azpitituluetan sartu. Ez dut uste gure hizkuntzaren normalizazioa distortsioaren eskutik helduko denik.

Guztiok animatzen zaituztet bi zita hauetara. Gertaerak kontatu egin behar baitira, unean salatu eta salaketa horietaz harago joan, buelta eman. Gero, urteak pasa ondoren horrelakoak esateko eta kontatzeko beharrik izan ez dezagun: No lloréis, lo que tenéis que hacer es no olvidarnos.

Bi adierazpide hauek ikaragarri gustatu zitzaizkidan baina, asteburu honetarako, umore piskat nahi dut. Horregatik (eta lagun batzuk ona dela esan didatelako, obraren ideia polita iruditu zaidalako, erreferentziak gustatu zaizkidalako....) gaur, Errautsak antzezlana ikustera noa. Norbaitek intentzio bera baldin badu, asteburu honetan bi aukera ditu: Elorrioko Arriola Antzokian gaur 22:00etan, edo bihar Durangon. 

Egiten duzuena egiten duela... Ongi pasa asteburua!

Elcorreo.com-eko blogen analisia

Elcorreo.com atariko bost blog aztertu ditut. Horretarako, hedabideen interaktibitate maila aztertzeko erabilitako metodologia bera aplikatu dut, hau da, hainbat parametro kontuan hartzen dituen azterketa gida bat. Goazen harira:

• Game over : bideo eta argazki pila bat sartzen ditu post-etan baina ez du horien egiletza aitortzen. Ez dauka estilo propiorik eta gainera ez du irudia batere zaintzen. Hainbat tamainatako argazki zein bideoak darabiltza, kokapen zeharo ezberdinekin eta gainera, irizpide ez parekoen arabera antolatzen ditu sarrerak. Halaber, testu luzeegiak idazten ditu, soberako informazioaz mintzo da. Izan ere, informazioa zabaltzeko testu loturak darabiltza, hortaz, horien erabilera egokia eginez gero testua ez litzateke horrenbeste luzatu behar. 

• Heroes : Testuak oso luze, loturarik ez eta bideorik ere ez. Argazkiak badaude baina aurrekoan bezala, Internetetik hartuak dira eta ez da egiletza aitortzen. Bertako edukia tradizionala da, ez da Sarerako sortu. 

• Humo y espejos : testu motzagoak ageri dira eta osagai multimedien alde egiten du. Baina ez du inolako egiletzarik aitortzen eta ez du diseinua zaintzen. Hori bai, Interneterako idazten du.

• Influencias : Heroes blogaren itxura berekoa da baina edukitan pobreagoa. Ez du tag-ik erabiltzen, ez dauka etiketentzako atalik. Eta hamaika hilabatetan zortzi sarrera soilik publikatu ditu. Zertarako dauka blog bat? Ez baldin badauka kontatzeko ezer...

• Ja-ja: Jesus Zulet El Correoko umorista da eta blog honetan bere binetak erakusten ditu. Sarrerak etiketatuta eta batzutan testuz lagunduta daude, baina aztertutako beste lau blogetan bezala, oro har, ez dauka feedback-ik publikoarekin. Oso iruzkin gutxi dauzka.

Azterketarako egokitu zaizkidan blog guztiak Elcorreo.com-ekoak izan dira eta guztiak hedabideak ahalbidetzen duen plantila batean oinarrituta egin dira. Komunikabideak bertako profesionalei, adituei, zein erabiltzaileei plantila bera uzten die aukeran, beren plataforma komunikatiboa izan dezaten. Ondorioz guztiek itxura bera eta sekzio berak dituzte. Nire iritziz, blog hauei multimediatasuna falta zaie. Bai oinarrian (edukiak sortzerakoan Sarerako egiteko kontzientziaz aritzea) eta baita praktikan ere (ez dute interakziorako bide asko). Finean, hobetu daitezke.

Debako animazio zinemaldia, Animadeba

Debako Udalak Animazio zinemaldia antolatu du aurten hirugarrengoz. Animadebaren zita abenduaren 26-30 bitartetan izango da eta jaialdia iragartzeko gortina lehiaketarako deialdia ere egin dute. Hona hemen Ti-Ta produksions-en egin dugun stop motiona.

Gai hunkigarriak teknologia berrien eta masa kulturaren garaian

Azken bi asteetan sexu eta biolentziaren trataera landu dugu Santirekin klasean. Gaur amaitu dugu ikasgaia eta bukatzeko lan txiki bat aurkeztu dugu. Bakoitzak irudi bat aukeratu du eta bere testuingurua, trataera, elementuak... aztertu ditu. Hona hemen World Press Photo erakusketan aukeratu nuen irudiaren azterketa:

Audio erreportajea: gazteak eta bizi ereduak

Soinu istorioa eta gero soinu erreportajea egiteko eskatu zitzaigun Pista anitzeko edizioa eta irrati era berrituak ikasgaian. Gazteriaren inguruko bigarren talde lan honetan, gazteon bizi ereduen inguruan hausnartu dugu. Horretarako, edozein gazteren larunbat bat hartu dugu ardatz. Goizean jeiki eta irratia piztuko du gure protagonistak, Internet bidez komunikatuko da eta eguna ongi amaitzeko bikotearekin geratu eta parrandan aterako da.

XXI. mendeko gizarte honek hainbat topiko eta estereotipo helarazten dizkigu gazteoi gure bizi ereduak markatzeko asmoz. Bizi eredu kapitalista inposatzeko saiakera hori salatzen saiatu gara lan honetan.


Gazteok eta bizi eredua by keikrass

Azaroak 25: indarkeria sexistarik ez!

Gaur, azaroak 25, emakumeenganako indarkeriaren aurkako nazioarteko eguna da. Euskal Herriko leku gehientsuenetan bezala, Elorrion ere, hainbat ekintza programatu dira gaurko. Arratsaldean izango dugu zita elorriarrok. 19:30etan kontzentrazioa egingo da herriko plazan eta ondoren, 20:00etan, indakeria matxistaren bestelako adierazpenak ezagutarazteko dokumental emanaldia burutuko da Iturri Kultur Etxean. Ekimen xume horretan egin digute lekua Ti-Ta produksions-ekooi. Beldur Barik! lehiaketara aurkeztu genuen lana proiektatuko dute bertan. Ilusioa egin digu berriak eta pena handia da bertan egon ahal ez izatea, baina aukera gehiago izango direlako esperantza daukagu...

Garai batean San Isidro edota Santa Eulalia bezalako egunak ospatzen ziren, egun, egutegiek izena eta izana ere aldatu dituzte. Orain ez dakit zeren aldeko eta kontrako egunak "ospatzen" ditugu eta tamalez, denak dira salaketa edo kontzientziazio asmoz ezarritako datak. 

Bestalde, gogoratu larunbat honetan, azaroak 27, Beldur Barik! jaialdia ospatuko dela Bilbon. Bertaratzeko asmoa duenak edo nondik norakoak ezagutu nahi dituenak hementxe bilatuko du informazioa: http://www.beldurbarik.org/

24OD: Ni ez naiz... film laburra

Bosgarren edizio honetan 15 taldek hartu dugu parte 24 Ordu Digitalean lehiaketan. Inoiz baino kalitate gehiago izan da aurten, beraz, lan politak ikusteko aukera izan dugu. Aurtengo oinarriak hauexek izan dira:

- Gaia: Iruzurra

- Esaldia: "Legea egin zunak, tranpia egin zun"

- Objektua: Hautsa

Guk, hamaika buelta eman genizkion buruari eta afal ordurako argi genuen zein izango zen gure aurtengo lana, baita nola egingo genuen ere. Gainera laguntzaile musikariak ere bagenituenez abesti bat egitea bururatu zitzaigun. Lana osatzeko eta gure mezua ulertarazteko. Baina azkenean, soinu grabaketa eskasa zela eta filma jantzi beharrean, biluztu egin zuen musikak, hutsik laga. Hala ere, poz-pozik entregatu genuen gure lana. Nahiz eta gutxi jan eta are gutxiago lo egin, ikaragarri ondo pasa genuen. 

Hori bai, gure hausnarketatxoak ere egin ditugu eta datorren urterako istorio sinple bat egiteko erronka jarri dugu. Ez dakit gure burmuinek utziko diguten baina hala izan dadila! Izan ere, emanaldia amaitu eta gure lanaren inguruan hizketan entzun genituen gehienek ez zuten filma ulertu. Hementxe duzue ikusgai, eta norbaitek ulertzen ez badu galdetu dezala edota bere inpresioak bota ditzala. Blog honek izango lukeen lehen iruzkina litzateke, hala bada, gustora-gustora erantzungo dut. Goza dezazuela!

Kameratoia: seigarren edizioko film irabazleak

Hauek izan dira KAMERATOIA 2010eko irabazleak: 

3. SARIA: 900 EURO
TALDEA: PuntutAparte
FILMA: “Ermugarra” 

2. SARIA: 1.200 EURO

TALDEA: Zapatilla Films

FILMA: "Biak bat"

1.SARIA: 1.500 EURO

TALDEA: Epalzaren Alargunak

FILMA: “II”

Ederrak dira hiru lanak bai horixe! Zorionak sarituak izan zareten guztioi eta besteoi, gu bezala bidean aritu zaretenoi, zorionak baita ere eta segi lanean. Ondo pasatzeaz gain proiektuz proiektu zerbait gehiago ikasten baita beti. Datorren urtera arte!

Badator 24OD bideo lehiaketa

Heldu da eguna. Gaur hasten da 24 ordu digitalean film labur lehiaketa. Gogotsu geunden eguna iristeko zain. Hainbat lantxo egin ditugu orain arte baina hauxe da benetan atsegin duguna. 24 ordu besterik ez. Istorio bat sortu, grabatu, muntatu eta azkenik, onena (saria bera baino gehiago agian), egindakoa zineko pantaila handian ikusi. 

Arratsaldeko bostetan argituko dute bosgarren edizio honetako gaia, esaldia eta objektua. Eta bihar bostetan entregatu beharko da lana. Hainbat taldek eman omen dute izena honezkero, hortaz ziur, polita izango dela! 

Emanaldia bihar izango da gaueko 10etan eta ondoren sari banaketa. Guk entrenamendu piskat egin dugu aurten eta ekipo teknikoa prest daukagu. Orain bapo bazkaldu, siesta gozo batetik esnatu eta kaleak astintzera aterako gara! 

Gaur gurekin gurutzatzera doanak grabaketei fobia badie buelta erdia eman eta alde egitea izango du onena. Abisatu duena barkatuta omen dago... Parasito bihurtu eta daukagun onena ematen saiatuko gara!!!

Soinuen bidez komunikatzen

Soinuen bidez istorio bat kontatzeko lanari ekin genion atzo Pista anitzeko edizioa eta irrati era berrituak irakasgaian. Irratia ulertzeko beste modu bat helarazten saiatu dira irakasleak, guk, sormen lan txiki bat egitea lortu dugu eta bide batez Audacity programa ezagutu eta erabiltzea. Masterreko bigarren modulu honetan taldeka banatu gara proiektutxoak sortzeko. Gazteriaren inguruko hiru lan egin behar ditugu eta hauxe da lehenengoa:

Bortxaketa by keikrass

 Zer gertatzen da? Zer komunikatu nahi izan dugu lan honekin? Zuen erantzunak espero ditut!

Kameratoia 2010 film labur lehiaketa: Ito arte

Kameratoia film labur lehiaketan izena eman genuen aspaldi eta ia oharkabean heldu zen zita. Zertaz ari naizen ez dakizuenontzat Euskal Herriko Ikus-Entzuneko Rallyaren ezaugarriak aipatuko ditut. Film laburra egiteko gai bat eta ezaugarri batzuk banatzen dituzte antolatzaileek.

Horrela, parte hartzaile guztiok oinarri beraren gainean sortzen ditugu gure lanak. Aurtengoan Muga-mugan izan da landu beharreko gaia eta Ermuko 10 ezaugarriko zerrenda batetik hiru gutxienez islatu behar izan ditugu filmetan. Hauexek aukerak:

• DROGETENITTURRI herri aldizkaria
• Ego ibaia
• Probalekuko harria
• Eskilara mekanikoak
• Plazako frontoia
• Kaltxangoko kruzea
• Abeletxe baserria
• Errekalde
• Skate parkea
• Bost solairu baino gehiagoko etxea

Larunbatean batu ginen. Buruari behar beste buelta eman ondoren grabaketa lanak hasi genituen eta amaitzeko edizioa. Etzi izango da sari banaketa Ermuko Lobiano Kultur Gunean. Bertara hurbiltzeko aukera ez daukanak edota gure lana ikusteko horrenbeste itxaron ezin duenak hementxe dauka gure piezatxoa. 

Gora dezibelioak!!!

Emakumeok hainbat indarkeri eredu jasaten ditugu. Bortitzena indarkeria fisikoa da. Baina zer gertatzen da hain agerikoa ez denean? psikologikoa denean? Ez da pentsatu behar indarkeria gizonezkoei dagokienik. Izan ere, ze paper daukagu emakumeok indarkeriaren zilegitasunean? Ez al dugu guk ere batzuetan distortsio inposatu hori elikatzen? Ez al gara gure ingurukoak mintzen, iraintzen, gutxiesten dibertitzen? Eta ez al ditugu geure buruak behin eta berriro txikitzen zein suntsitzen?

Nahikoa daukagu sistema patriarkal honek inposatzen dizkigun desberdintasunekin: lan baldintza prekarioenak, edertasunaren kanon irreala, sexuagatiko diskriminazioa... Eta gainera, indarkeria guzti hori gutxi balitz bezala, geuk beste batzuk sortzen ditugu. Emakumeon artekoa, geure buruekikoa. Badirudi urteetan zehar lotuta egonak, loturak sortzera eraman gaituela. Lan honetan salatu nahi izan dugu hori, lotura berrien produkzioa besterik ez baita. Autolesiora garamatzan amaierarik gabeko soka. 

Batzutan ahaztu egiten dugu baina GEU gara gure bizitzako protagonistak. Inork ez du gugatik sentituko, gozatuko, barre egingo. Jar diezaiogun bolumena gure bizitzaren soinuari. Entzun nahi ez duena izorra dadila! Gora dezibelioak!!!

Beldur barik! adierazpen artistiko lehiaketa

Berdinsareak, Berdintasunaren aldeko eta Emakumeen aurkako indarkeriaren kontrako Udalen Sareak, Beldur Barik! lehiaketa antolatu du. Lehen edizioa da aurtengoa eta helburuak bete-betean konbentzitu gintuen: modu batera edo bestera emakumeen aurkako indarkeria zuzenean edo zeharka gaitzesten duen adierazpen artistiko oro, balioetsi eta sustatzea.

Ikus-entzunezko laburra egin dugu Ti-Ta produksions-etik. Lana amaituta daukagu. Hainbat formatutara pasa, izen-emate orria bete, gutunazala itxi eta bihar entregatuko dugu Elorrioko Udaleko Berdintasun Sailean. Bihar da lanak aurkezteko azken eguna. Momentuz gure azken proiektutxoaren soinu bandarekin utziko zaituztegu. 

Hasiera by keikrass

Bukaera by keikrass

Audacity ezagutzen

Pista anitzeko edizioa eta irrati era berrituak irakasgaia hasi dugu. Ideiarik ere ez daukagu soinua nola editatzen den multipistan beraz, lehenik eta behin audio edizio programaren bat erabiltzen ikasi beharko dugunez, Audacity-a deskargatu eta trasteatzen hasi gara. Hotsen bidez minutu bateko istorio bat kontatzeko erronka jarri ziguten atzo klasean, hona emaitza:

Soinu istorioa by keikrass

Norbaitek ulertzen ez badu, edo hobetzeko asmoz kritikak egin nahi baditu, ongi etorria izango da!

Handikhona podcast-aren aurkezpena

Iheskide taldearen azken emanaldia

Elorrioko Iheskide musika taldeak azkeneko zuzenekoa eskainiko du bihar herriko probalekuan. Iheskide punckrocka lantzen duen talde gaztea da. Indartsuak, bizkorrak, sarkorrak eta zuzenak dira, haien kantuak eta baita kontzertuak. 

2004an hasi zuten talde ibilbidea Ihesbide izenarekin eta boskote moduan. 2006an zazpi abestiz osatutako maketa grabatu eta kaleratu zuten. Gainera, Gazte Sareak eta Xirikak kaleratutako "Gazte sortzaileen eskutik okupazioaren aldeko oihuak" bilduman parte hartu eta Txirringaz´06-ko abestia ere egin zituzten.

Garai hartan, taldekide batek taldea utzi zuen eta ordurarte baxu-jotzaile aritutako Gaizkak hartu zuen ahotsaren ardura. Abesti berriak landu zituzten eta 2008ko martxoan kaleratu zuten "dagokiguna" diska. Lana kaleratzeaz bat bideoklip bat ere grabatu zuten. Eta gustora lagundu genuen Ti-Ta produksionsetik proiektutxo hura aurrera ateratzen. Udako agenda kontzertu eta jarratzailez puztu zitzaien baina uztailaren 22an, estatu espainiarreko indar errepresiboek Gaizka atxilotu, torturatu eta espetxeratu egin zuten. Amorruz editatu genuen aurrez grabatutakoa eta Elorrixoko gaztetxeko aforoa lehertu zuen abuztuak 30eko kontzertu berezi hartarako prestatu genuen ondorengo lana:
 

Urte eta erdiko geldiunea eta gero, 2010eko otsailean IhesKide lana kaleratu zuten.  Lagunekin zein hainbat taldetako musikarirekin batera egindako lan borobila da: "30 minutu inguruan zehar barne suak bizi-bizi jartzea bilatzen duen punk-rock txertoa".

Eta oraingoz IhesKideren azken emanaldia izango da. Musika arma moduan erabilita eta herri hontan bizi dugun eguneroko "malaostiak" inspiratuta, punk&rock-az gozatzeko, aldarrikatzeko eta kolpatzeko bizi den talde Elorriarrarekin gozatu ahal izateko azken aukera izango da. Bazatoz? 

Informazio gehiagorako Myspace-a eta Facebook-a bisitatu

Mikel Ayestaran: berriemaile berezia

Gaurko eskola Mikel Ayestaran kazetariak eman digu. Mikelek freelance bezala egiten du lan EiTB zein Vocento taldeentzako eta gehienbat Libano, Siria, Afganistan, Irak, Pakistan eta Iran aldetik ibiltzen da, beti motxila aldean eta istorio bila.

Pertsona interesgarria eta gertukoa iruditu zait. Garbi dauka albisteak ez direla edozelan lortu behar. Gerra kazetaritza egiterakoan erraza bezain ohikoa da trataera morbosoaren bilaketa eta baita askotan, dolarrez zikindutako argazki zein testigantzen emaria. Mikelek argi utzi digu zein den bere ikuspuntua: herritarren aldekoa. 

Mikel Ayestaran: "Multimedian edukia menperatzea baino errazago da teknika menderatzea"

Hitzaldian aipatutako gauza esanguratsuenak bildu ditut zuekin elkarbanatzeko:

• Teknologiak irudia demokratizatu du: garrantzitsuena azkartasuna da.
  
  
• Multimediak azkartasuna inposatzen du, kalitatea arriskuan jarriz.
  
  
• Gero eta kamera berri eta modernoagoak daude baina profesional gutxiago. 
  
  
• Erreportajegintzan bertako ikuspuntua bilatu behar da. Garbia izan biktimekin, istorio pertsonalak bilatu eta baimenak eskatu, beti. 
  
  
• Komunikabideetan gerra kazetarien albisteak bigarren planokoak dira, lehenengoak informazio agentziek filtratzen dituztenak dira. Hortaz, informazio agentzien ohiartzuna aprobetxatu behar da beste istorioak txertatzeko. 
  
  
• Egunkariak sakontasuna ematen du. Telebistak aldiz, indar eta eragin gehiago dauka: helburuaren arabera euskarri bat edo beste hautatuko da (kontuan izan gainera, hedabide bakoitzak hartzaile ezberdinak dituela). Multimediak aipatutako helburuok uztartu beharko lituzke.

Informazio gehiagorako Mikelen bloga eta Youtubeko kanala bisitatu.

Bidaia Bilbon

Bilbo hiri oparoa eta zirraranitza da txango bat egiteko, horregatik aukeratu dugu Bidaiari dubi dubi lehiaketarako eszenatoki. Gero eta turista gehiagok gehitzen du Bilbo Euskal Herriko ezinbesteko txokoen zerrendan. Eta halaxe da, ez du hutsik egiten. Arkitektura modernoena eta zaharrena uztartu ditu Bizkaiko hiriburuak, bertako jaiak paregabeak direla dio batek baino gehiagok etab. luze bat (ez gara soberan dauden laudorioetan eroriko). 

126 nazionalitateko hiritarrak omen daude eta 110 hizkuntza ezberdin hitz egiten omen dira. Aniztasun horren bila joan gara Bilbora, edozein turistaren betaurrekoak jantzita. Gizarte integratua izateko lan ugari daukate oraindik egiteke bertan, hala ere, kultur-aniztasuna jaio eta arnasten hasi da dagoeneko: gastronomikoki nabari daiteke, musikalki, bisualki... 

Hiriak milaka bidai inspira edo oroitarazi ditzake. Hautatzekotan beti bigarren aukera hobe! Ez baita gauza bera, jatorriz atzerrikoa den hori hemen ezagutzea edo lehen eskutik dastatzea. 

Bidaiatzen... from keikrass on Vimeo.

Anboto.org, Publico.es eta Le Monde.fr : interaktibitate maila

Tokian tokiko, espaniako eta nazioarteko hiru ziberegunkari aztertu ditugu urriaren 5 eta 6a bitartean, Koldo Mesok pasaturiko azterketa gida bat oinarri hartuta. Interaktibitatearen inguruko analisia egiteko aukeratu ditudan hedabideak Anboto.org, Publico.es eta Le Monde.fr izan dira. Bai hurrenkera geografikoz, baita, interaktibitate mailari dagokionean ere. 

Aztergai batean ere ez da herritarren parte hartzerako espazio zehatzik ageri. Hortaz, erabiltzaileak ez dauka bere interakziorako pentsaturiko inolako txoko zehatzik. Hala ere badaude beste hainbat bide. Esaterako, Anbotok eta Le Mondek inkestetan parte hartu eta emaitzak ikusteko aukera eskaintzen dute. Azken horrek eta Publicok aldiz, lehiaketak zein chat-ak eskaintzen dituzte eta hedabide frantsesak, aktibo dauden foroak ere baditu.

Anbotoren interaktibitate maila hiruretan bajuena da. Bertako albisteak feed-ak jasotzeko aukera eskaintzen duten arren, irakurtzeko soilik dira. Publicok aldiz, erregistratuz gero, albisteak iruzkintzeko aukera dauka eta gainera, bozkatu, gorde, inprimatu eta Sarean elkarbana daitezke. Hedabideari dagozkion blog propioez gain, erabiltzaileari komunitateak sortzeko aukera ere ematen dio. Hala ere, ezin daitezke ez albisteak, ezta bideoak bidali hedabidera, nahiz eta erredakziora zein autoreen e-postetara idazteko aukera badaukan. Albisteen tipografia eta tamaina moldatu daitezke eta rss bidez jarraitzeko aukera dago. Gainera Facebook eta Twitter sare sozialetan ageri da.

Le Monde osatuena eta aurreratuena da interakzioaren aplikazioan baina hilean sei euro ordainduz gero soilik goza ditzake erabiltzaileak bide honetan garatutako baliabideak. Bai Publicoren kasuan ageri diren denak eta baita, blogak sortzeko, argazkiak zein albisteak bidaltzeko, informazioa nahierara hierarkizatzeko edota edukiak erabiltzailearen arabera moldatzeko aukerak.

Beraz, Le Monde da teknologikoki hedabide interaktiboena baina badirudi etorkizuna ordainpekoa izango dela. Ederra litzateke interakzio maila bera eskaintzea dohainik eta denontzat, bai nazioarteko hedabideek eta baita tokikoek ere.

Bilbo, Japonia, Ti-Ta produksions

Zein da Bilbo, Japonia eta Ti-Taren arteko harremana? Piskat gehiago itxaron beharko duzue. Oraindik editatutakoa berorraztu behar dugu, protagonistari erakutsi, entregatu eta pare bat zerbeza hartu, amaitutako lanari agur esan eta hurrengoan pentsatzen hasteko. Hori egin bezain pronto zeuena izango da!

"Me la suda" bideo lan saritua

Urtebete pasa zen lanik egin gabe baina "24 ordu digitalean"-eko III. edizioa hurreratzen zebilela urduri jartzen hasi ginen. Zein izango zen gaia? Zein esaldia? Eta 2008ko objektua? Gogotsu heldu ginen Antzokiko Ateneora ostiral arratsaldez eta euforiko atera ginen bertatik larunbat gauez: 2. saria Elorrixoko Gaztetxearentzat! Politxa izan zan!

Orain dela hiru urteko lana: Arnasestuka

Elorrioko Arriola Antzokiak antolatutako "24 ordu digitalean" lehiaketara aurkezteko bildu ginen lehen aldiz Ti-Ta produksions-eko bi lagunok eta Elorrixoko Gaztetxeko beste hainbat kide. Gure lehen esperientzia izan zen kamera, kable, aktore, edizio, beredizio... munduan. Ongi pasatu genuen eta lan txukuna egin genuela esan ziguten. Denbora pasata, lanak beste era batera ikusten dira baina gure laburmetraia aurkeztu eta zine pantailan ikusi genuen egun hartan gustura sentitu ginen. Lehen esperientzia honetan hasi zen guztia.

Arnasestuka from keikrass on Vimeo.

"Bidaiari dubi dubi" bideo lehiaketa begi bistan

Bilboko Udaleko Kultura eta Hezkuntza Sailak, bidaiekin erlazionatutako bideo labur bitxiak sarituko ditu "Bidaiari Dubi Dubi" lehiaketaren lehen edizioan. Ti-Ta produksions-en martxan jartzea erabaki dugu. Gaur goizean ideia garatu, baliabideak bildu eta storyboard-a marraztu dugu eta datorren asteartean joango gara Bilbora gure bidaia bitxia grabatzera (handik bazabiltzate kontuz ibili!).

Antolatzaileek horrelako bideoak nahi omen dituzte. Gu horrelakoak baino ederragoak egiteko gai garela sinetsita gaude!

Lanak aurkezteko azken eguna urriaren 15ean izango da, egun horretan bertan ikusi ahal izango da bideolana Sarean.  Itxaron...

Ti-Ta produksions ezagutzera emateko informazioa

Nor gara eta zer egiten dugu? Elorrixoko bi neska gazte gara eta bideo lanak egiten ditugu. Hasteko orain arte egindako lanak Sareratuko ditugu. Hala ere, materiala bildu eta era egokian manipulatzen dugun bitartean, egunotan esku artean ditugun proiektuen gaineko informazioa ere emango dizuegu. 


Abendurarteko egutegia hartu dugu eta lau lehiaketa aukeratu ditugu: Bidaiari dubi dubi lehiaketa, Animadeba, Kameratoia eta 24ordudigitalean.

Facebook-eko orrialde bat ere sortu dugu. Gainera, neu taldekidea ere banaiz, beraz, nire blog honetan ere Ti-Taren berri izango du nahi duen orok.

Aurkezpena

Kazetaritzan lizentziatu berri den elorrixarra naiz. Leihoak ireki blog honetatik multimedia komunikaziora salto egiteko asmoa daukat. Izan ere, lizentziatura amaitu berri eta praktikarik gabe nagoenez etorkizunera begira garrantzitsua izango den esparru honetan murgildu nahi dut. Horretarako, lehenik eta behin nire mundu komunikatiboaren leihoak garbitu beharko ditut, ondoren, ireki eta salto egiteko. Gogotsu nator Multimedia Komunikazioa EHU-EITB Masterrera.